Նոր եմ վերադարձել եռօրյա ճամփորդությունից դեպի Ջերմուկ: Ես այդքան էլ սիրահար չէի ճամփորդությունների,ճամբարների ու երևի ընկերներիցս միակն էի,որ միշտ խուսափում էի որևէ ճամբարի մասնակցել։ Բայց հիմա, երբ պետք է պատմեմ այս ճամփորդությունից,արդեն անհամբեր սպասում եմ հաջորդին։ Ջերմուկում ամեն ինչ շատ լավ անցավ:Առաջին օրը մենք գնացինք Ջերմուկի մայր գործարան,որտեղ մենք շատ մանրամասներ իմացանք ջերմուկի արտադրությունից։ Տեսանք հոսքագծերը,որտեղ շշալցվում էր, ապա արկղի մեջ տեղափոխվում մեր խանութներում վաճառվող ջերմուկ հանքային ջուրը։ Նաև իմացանք որ Ջերմուկի գործարանում աշխատում է 120 աշխատակից:Դա իմ կարծիքով շատ կարևոր է,որ այդ փոքր քաղաքում կա գործարան,որն աշխատատեղ է ջերմուկցիների համար։ Օրը եզրափակեցինք սահնակ քշելով և զբոսանքով:Հաջորդ օրը մենք գնացինք ճոպանուղի։Օդային այս փոխադրամիջոցի երկարությունը 1 կմ է, դրա վերջին կետից շատ լավ տեսանելի է առողջարանային քաղաքը: Ճոպանուղին գտնվում է Ջերմուկ քաղաքի սկզբնամասում, ունի 2 դահուկուղի։Ներքևի և վերևի հենասյուների միջև եղած բարձրության տարբերությունը 400 մ է։ Ամենաբարձր կետը գտնվում է 2480 մ բարձրության վրա։Ճոպանուղուց հետո մեզ սպասվում էր քայլարշավ ձնառատ ճանապարհով դեպի Ջերմուկի ջրվեժ: Գնում էինք,գնում տեղ չէինք հասնում։ Երբ հասանք,տեսանք սառցեպատ քարեր, ջրվեժը սառած էր։Երեկոյան արդեն մենք մասնակցեցինք winter cold երիտասարդական փարթիին։ Ձնեմարդուկ 2017 փառատոնի մասնակիցները հավաքվել էին կրակի շուրջ,պարում էին ու երգում։ Մենք էլ ընկեր Սաշայի հետ «Խամ-խամա» սովորեցրեցինք մասնակիցներին։Մի խոսքով այս ճամփորդությունը ինձ շատ դուր եկավ և անցավ շատ հետաքրքիր:
Комментариев нет:
Отправить комментарий